काठमाडौ । संकटा बचत तथा ऋण सहकारी संस्था लिमिटेडको १३ औँ वार्षिक साधारण सभा गत शुक्रबार सम्पन्न भयो । राष्ट्रिय सहकारी संघका अध्यक्ष केशवप्रसाद बडालले सभाको उद्घाटन गर्दै गरिबी निवारणमा सहकारीको भूमिका अहम रहेको उल्लेख गर्दै आर्थिक विकासका लागि निजी, सरकारी र सहकारी तीनै क्षेत्र संगै मिलेर काम गर्नुपर्ने बताउनुभयो । अर्थशास्त्री डा. चिरन्जिवी नेपालले सहकारीले छरिएर रहेको पूँजीलाई एकीकृत गरी विभिन्न क्षेत्रमा लगानी गरेर राष्ट्रिय अर्थतन्त्रलाई भित्रबाट चलायमान बनाएको उल्लेख गर्नुभयो । नेपाल बचत तथा ऋण केन्द्रीय सहकारी संघ(नेफ्स्कून)का अध्यक्ष मिनराज कँडेलले बचत तथा ऋणसहकारीलाई वित्तीय कारोबारमा केन्द्रित हुन आग्रह गर्नुभयो । सभामा संस्थाका अध्यक्ष ईश्वरमान तुलाधरले आर्थिक वर्ष २०६८/२०६९को वार्षिक प्रतिवेदन प्रस्तुत गर्नुभयो । आर्थिक वर्ष २०६७/०६८मा शेयर पुंजी रु ५ करोड ७ लाख ८१ हजार ९ सय रहेकोमा आर्थिक वर्ष २०६८/०६९मा ०.५ प्रतिशतले वृद्धि भई रु ५ करोड ९ लाख ८ हजार ९ सय पुग्न सफल भएको जानकारी दिनुभयो । यस्तै आर्थिक बर्ष २०६७/२०६८मा रु ५१ करोड ५७ लाख ७ हजार ५ सय रुपैया निक्षेप संकलन गरेकोमा आ.ब.२०६८/०६९मा रु ६२ करोड ५ लाख ७ सय संकलन भएको सो सभामा जानकारी दिइयो । यस्तै कर्जा तर्फ आ.ब.२०६७/०६८ मा रु ३८ करोड ९० लाख ६० हजार कर्जा लगानी गरेकोमा आ.व.२०६८/०६९मा रु ४७ करोड ८० लाख ८ हजार ९ सय कर्जा लगानी गर्न सफल भएको संस्थाले जनाएको छ । यस्तै संस्थाले चालु आ.ब.२०६९।२०७०मा शेयर पूँजी ५ करोड ५० लाख पुर्याउने लक्ष्य लिनुका साथै चालु आ.व.मै निक्षेप ७३ करोड पुग्ने विश्वास लिएको छ । संस्थाका प्रवन्ध सञ्चालक बिन्देश्वर श्रेष्ठले दशैंअघि नै आºना सदस्यहरुलाई डेविट कार्डको व्यवस्था गर्ने योजना रहेको जानकारी दिनुभयो । यस्तो व्यवस्थाले दशैं तिहार वा अन्य चाडपर्वमा समेत रकम बोकेर हिंड्ने झन्झटबाट सदस्यहरु मुक्त हुने प्रवन्ध सञ्चालक बिन्देश्वर श्रेष्ठले भनाइ छ ।
